Forsíða::

Framkvæmdir

Þegar inn er komið

Þegar keypt er Internet-, síma– eða sjónvarpsþjónusta hjá þjónustuaðilum er sett upp netaðgangstæki á heimilinu. Heimilið þarf ekki að greiða fyrir uppsetninguna. Gagnaveita Reykjavíkur staðsetur netaðgangstækið í samráði við íbúa. Tækið er yfirleitt staðsett miðsvæðis á heimilinu svo auðvelt sé að tengja það við síma, sjónvarp og tölvu. Mismunandi er eftir heimilum hvaða lagnaleið hentar hverju sinni. Ef smáspennutafla og lagnir eru til staðar er netaðgangstækið sett upp við hlið töflunnar svo hægt sé að nýta þær lagnir til að tengja annan búnað. 

Ef lagnir eru ekki til staðar er miðað við að lagning á þjónustulögnum skuli vera einföld og utanáliggjandi. Frágangur lagnanna skal vera þannig að íbúar verði ekki fyrir óþægindum við daglega umgengni heima hjá sér. Leitast skal við að hafa þær sem minnst áberandi og þannig að viðskiptavinur hafi möguleika á að bæta fráganginn seinna. Í einhverjum tilvikum þarf að bora í vegg til að forðast langar lagnaleiðir. Ef að húsráðandi fer fram á miklar og erfiðar þjónustulagnir þá getur húsráðandi kallað eftir því, en greiðir sjálfur fyrir þá auknu vinnu sem í því felst.

Á þessari mynd sést hvernig jaðarbúnaður og tæki eru tengd við netaðgangstæki.




 

 

Skýringar á tækjum og búnaði innanhúss 

Inntakskassi

Inntakskassi er kassi sem staðsettur er fyrir innan húsvegg og tekur á móti ljósleiðaranum inn í húsið. Húseigandi þarf ekki að tengja sjálfur neinn búnað við inntakskassann.

Netaðgangstæki

Frá inntakskassa er lagður ljósleiðari að netaðgangstæki. Netaðgangstæki er endabúnaður á ljósleiðarann sem kemur þér í samband við Internet, síma og sjónvarp.

Á einni gerð netaðgangstækja (sjá mynd) eru tvö RJ11 tengi fyrir venjuleg símtæki og þrjú RJ45 tengi, tvö fyrir tölvu og eitt fyrir myndlykil. Ef tengja á fleiri en eitt tæki sömu tegundar við netaðgangstækið, t.a.m. tvo myndlykla, þá þarf skipti þar á milli.

Á annarri gerð netaðgangstækja (sjá mynd) eru tvö RJ11 tengi fyrir venjuleg símtæki og fjögur RJ45 tengi, tvö fyrir Internet og tvö fyrir myndlykla. Ef tengja á fleiri en tvo myndlykla við þessa gerð þarf að nota skipti.  
 

Beinir (e. Router)

Beinir er notaður ef tengja á fleiri en tvær tölvur við Internetið eða ef óskað er eftir þráðlausu neti innan heimilis. Flestir Internetþjónustuaðilar leggja viðskiptavinum sínum til beini en einnig er hægt að kaupa hann í tölvubúðum.

Myndlykill

Fyrir gagnvirka sjónvarpið þarf að tengja myndlykil við netaðgangstæki og sjónvarp. Einn myndlykil þarf fyrir hvert sjónvarpstæki. Það fer eftir gerð netaðgangstækis hversu marga myndlykla er hægt að tengja beint við netaðgangstækið. Myndlykil færðu afhentan þegar þú pantar sjónvarpsþjónustu.

Skiptir (e. Switch)

Skiptir er notaður þegar tengja á fleiri en eitt sjónvarpstæki við eldri gerð netaðgangstækja (sjá mynd) eða fleiri en tvö sjónvarpstæki við nýrri gerð netaðgangstækja (sjá mynd). Þá er skiptirinn staðsettur á milli netaðgangstækis og myndlykils. Skiptirinn deilir sjónvarpsmerkinu niður á fleiri tæki innan heimilisins. Skiptir er einfaldur og ódýr búnaður sem fæst í öllum tölvubúðum. Gagnaveita Reykjavíkur útvegar ekki skipti.

 


 

Dæmi um ljósleiðaratengt hús sem er ekki með smáspennutöflu

  • Tvö sjónvörp tengd í gegnum skipti
  • Tvær tölvur tengdar í gegnum þráðlausan beini
  • Tveir símar tengdir inn á fyrirliggjandi símalagnir

Smelltu á myndina hér að neðan til að sjá stærri mynd:



Get ég tengst?

  

Gagnlegt að vita

 

Gaman að vita

Einn stærsti kostur Ljósleiðarans er gagnvirkt sjónvarp. Með gagnvirku sjónvarpi getur þú fengið myndleigu, allar íslenskar sjónvarpsrásir og fjölda erlendra rása.

Hægt er að hafa fleiri en einn myndlykil án þess að það hafi áhrif á hraða Internetsins.